ՀՀ ԳՆ Երկրագործության գիտական կենտրոնը կազմակերպվել է 1926 թվականին:
Գիտական կենտրոնը իր գործունեության տարիներին մեծ ավանդ է ներդրել Հայաստանում գյուղատնտեսական գիտության զարգացման և արտադրությունում գիտության նվաճումների ներդրման գործում:
Ներկայումս գիտական կենտրոնում տեսական ու կիրառական բնույթի բազմատեսակ աշխատանքներ են իրականացվում սելեկցիայի, սերմնաբուծության բաժիններում, ագրոքիմիայի և կենսաքիմիայի լաբորատորիաներում: Ուսումնասիրությունները տարվում են աշնանացան ցորենի և գարու, հատիկաընդեղեն մշակաբույսերի համաշխարհային հավաքածուի ուսումնասիրության, ընտրասերված սորտերի արդյունավետ տեխնոլոգիայի մշակման, ձմեռադիմացկուն, պառկելու և հիվանդությունների նկատմամբ կայուն, բարձր բերքատու սորտերի ստեղծման, գյուղատնտեսական արտադրության ոլորտում օգտագործվող պեստիցիդների մուտագեն ակտիվության, պեստիցիդների և ֆիզիոլոգիական ակտիվ նյութերի համատեղ ազդեցության մեխանիզմի պարզաբանման ուղղությամբ:
Գիտական կենտրոնը համատեղ ծրագրեր է իրագործում չորային գոտիներում գյուղատնտեսական հետազոտությունների միջազգային կենտրոնի (ICARDA), ցորենի և եգիպտացորենի բարելավման միջազգային կենտրոնի (CIMMYT), ինչպես նաև տեղական ԳԱԱ «Հայկենսատեխնոլոգիա» գիտաարտադրական կենտրոնի, ՀԱԱՀ-ի կենսատեխնոլոգիայի գիտական կենտրոնի գենոֆոնդի պահպանման լաբորատորիայի, Սիսիանի սերմարտադրողների միության, ԵՊՀ-ի կենսատեխնոլոգիայի լաբորատորիայի, Միկրոբիոլոգիայի գիտական կենտրոնի, Ղարաբաղի սերմնաբուծության և սելեկցիոն նվաճումների պահպանության կենտրոնի հետ:
Միջազգային կազմաերպությունների հետ համագործակցության արդյունքում վերջին տասնամյակում շրջանացվել է աշնանացան ցորենի 6, աշնանացան գարու 6 և սիսեռի 4 սորտեր: Պետական սորտափորձարկման է ներկայացվել աշնանացան ցորենի 5, սիսեռի 3, սոյայի 2 և ոլոռի 1 սորտ:
Գիտական կենտրոնը իրականացնում է մասնագիտական խորհրդատվություն և ծառայությունների մատուցում ֆերմերային և գյուղացիական տնտեսություններին:
1. Դաշտային մշակաբույսերի սերմերի ծլման էներգիայի և ծլունակության որոշում,
2. Հողում հումուսի, մատչելի ազոտի, ֆոսֆորի և կալիումի պարունակության որոշում,
3. Մշակաբույսերի ազոտով, ֆոսֆորով և կալիումով ապահովածության որոշում,
4. Հացահատիկային և հատիկաընդեղենային մշակաբույսերի բերքի որակական գնահատում,
5. Մշակաբույսերի ցանքի, պարարտացման և սնուցման նորմաների ու ժամկետների հաշվարկում,
6. Մշակության լավագույն տեխնոլոգիայի առաջարկում:
Տնօրեն` Աբրահամ Ղուկասյան
Հեռ.` (+374231) 5 34 54
Հասցե` ՀՀ, ք. Էջմիածին, Իսի-Լե Մուլինո 1
Էլ.փոստ՝ erkragorcutyun@mail.ru
«Երկրագործության գիտական կենտրոն» ՊՈԱԿ-ի կանոնադրություն
