ՀՀ գյուղատնտեսության նախարարի պաշտոնակատար Սերգո Կարապետյանն այսօր ընդունել է ՄԱԿ-ի պարենի և գյուղատնտեսության կազմակերպության (FAO) Կենտրոնական և Արևելյան Եվրոպայի տարածաշրջանային ներկայացուցչի տեղակալ, Հայաստանում ՊԳԿ-ի ներկայացուցիչ Անտոնիո Ալոնզիին:

 

Ընդգծելով մեր երկրում ՊԳԿ-ի իրականացնող գյուղատնտեսական ծրագրերի արդյունավետությունը, նախարարի պաշտոնակատարը ներկայացրել է Հայաստանի գյուղատնտեսության զարգացման համար առանձնակի կարևորություն ունեցող հիմնահարցերը, որոնց լուծման մեջ ՀՀ գյուղատնտեսության նախարարությունն ակնկալում է ՊԳԿ-ի օժանդակությունը:

 

Նշվել է հատկապես սպանդանոցների կառուցման, գյուղատնտեսական կոոպերատիվների ստեղծման, ջրային ռեսուրսների նպատակային օգտագործման, ծիրանի և խաղողի գենետիկ սորտերի պահպանման և օգտագործման, գյուղատնտեսական մթերքի իրացման շուկաների կազմակերպման ծրագրերի կարևորությունը: Որպես հրատապ աջակցության խնդիր է ներկայացվել վերջին ցրտահարությունից տուժած գյուղացիական տնտեսությունների վնասների փոխհատուցման գործում ՊԳԿ-ի հնարավոր օժանդակության ակտիվացումը:

 

«Մեզ համար հրատապ խնդիրներից է մնում նաև Արարատյան հարթավայրի ձկնաբուծական տնտեսություններում ջրի խնայողական համակարգերի ներդրման անհրաժեշտությունը»,- նշել է նախարարի պաշտոնակատարը , խնդրելով հնարավորինս արագացնել այս հարցում ՊԳԿ-ից ակնկալվող աջակցությունը:

 

Շնորհակալություն հայտնելով ընդունելության համար և հավաստիացնելով, որ պատրաստ է հնարավորինս նպաստել ՖԱՕ-ի կողմից Հայաստանում իրականացվող ծրագրերի իրականացման արդյունավետությանը, պարոն Ալոնզին , կազմակերպության քննարկմանը ներկայացնելու նպատակով, խնդրել է մանրամասն հիմնավորումներ տրամադրել վերոնշյալ հիմնահարցերի վերաբերյալ:

 

Տպել