Հայաստանի խաղողագործության և գինեգործության հիմնադրամն ամփոփել է 2017 թվականը և գինեգործների հետ քննարկել 2018-ի ծրագրերը

 

Հայաստանի խաղողագործության և գինեգործության հիմնադրամը հանդիպում է ունեցել գինեգործական ընկերությունների ներկայացուցիչների հետ:
Հիմնադրամի գործադիր տնօրեն Զարուհի Մուրադյանը ողջունել և շնորհակալություն է հայտնել գինեգործական  ընկերություններին նախորդ տարվա համագործակցության համար և նշել, որ հիմնադրամը բաց է բոլոր արտադրողների համար և պատրաստ է աջակցել ոլորտի զարգացմանն ուղղված գաղափարներին` ընդգծելով, որ ընթացիկ տարում ակնկալում է ավելի բարձր ակտիվություն և հետևողականություն:

 

Հանդիպման ընթացքում քննարկվել են 2017-ին իրականացված ծրագրերը և դրանց արդյունքները: Ընկերություններին է ներկայացվել 2018-ի գործողությունների պլանի նախագիծը, որն առաջիկայում կներկայացվի հոգաբարձուների խորհրդի հավանությանը:

 

Անդրադարձ է կատարվել 2018 թվականի փետրվարի 5-9-ը Մոսկվայում կայանալիք ՊրոդԷքսպո 25-րդ ամենամյա միջազգային ցուցահանդեսի մասնակցության մանրամասներին, քննարկվել են միասնական հայկական տաղավարի կառուցապատման, ընկերությունների տեղաբաշխման, գինիների բեռնափոխադրման հարցերը և այլն:

 

Շահագրգիռ քննարկում է ծավալվել նաև խաղողի այգիների կադաստրի և աշխարհագրական մակնշմամբ գինիների համակարգերի ներդրման շուրջ: Զարուհի Մուրադյանը նշել է, որ 2018-ին հիմնադրամի թիրախում լինելու է խաղողագործությունը, երկրում այս ուղղությամբ գիտական ներուժի բարելավումը, քանի որ հենց վերոնշյալ խնդիրների կարգավորումն է, որ կարող է բերել գինու որակի բարելավմանը, ոլորտի արդյունավետ կառավարմանն ու  վերահսկողությանը:

 

Գինեգործական ընկերությունների ներկայացուցիչները կարևորել են պետական աջակցությունն ի դեմս հիմնադրամի գործունեության՝ ընդգծելով, որ ոլորտին ցուցաբերվող աննախադեպ ուշադրությունն ու աջակցությունը մոտ ապագայում կտան իրենց  դրական արդյունքները:
Ամփոփելով հանդիպումը՝  Զարուհի Մուրադյանը բարձր է գնահատել հիմնադրամ-խաղողագործ-արտադրող բաց և թափանցիկ գործընկերային հարաբերությունները, հետադարձ կապի ապահովումը՝  ի նպաստ ոլորտի զարգացման:

 

ՀՀ գյուղատնտեսության նախարարության տեղեկատվության
և հասարակայնության հետ կապերի բաժին

Տպել