ՀՀ գյուղատնտեսության նախարար Իգնատի Առաքելյանն այսօր ընդունել է Նիդերլանդների Թագավորության արտակարգ և լիազոր դեսպան պարոն Յոհաննես Դաումային:Հանդիպման նպատակն էր քննարկել գյուղատնտեսության ոլորտում հայ-հոլանդական համագործակցության ընթացիկ ծրագրերն ու հետագա հեռանկարները:

 

Հանդիպման սկզբում դեսպանը շնորհավորել է Իգնատի Առաքելյանին նախարարի պաշտոնում նշանակվելու կապակցությամբ և հույս հայտնել, որ հայ-հոլանդականերկկողմ հարաբերությունները կշարունակեն առավել ակտիվորեն ընդլայնվել ու զարգանալ:

 

«Ես տեղյակ եմ, որ Նիդերլանդները մեծ աջակցություն է ցուցաբերում Հայաստանի գյուղատնտեսության ոլորտի զարգացման ուղղությամբ, և հուսով եմ, որ կկարողանանք գտնել հետագա համագործակցության համար նոր եզրեր», – նշել է նախարար Իգնատի Առաքելյանը:

 

Ընդգծելով, որ գյուղատնտեսության բնագավառում Նիդերլանդները  կուտակել է բավական մեծ փորձ` նախարար Առաքելյանը համառոտ ներկայացրել է մեր երկրի ագրարային ոլորտում առկա խնդիրները և հավելել, որ այսօր խիստ արդիական է աջակցությունն ու արտասահմանյան երկրների հաջող փորձի կիրառումը մասնավորապես հողերի ջրարբիացման, բնակլիմայական ռիսկերի նվազեցման, գյուղատնտեսական արտադրանքի որակի բարձրացման միջոցով արտահանման նոր շուկաների ստեղծման, գյուղատնտեսության ոլորտի վարկավորման պայմանների բարելավման և այլ ուղղություններով:

 

Որպես ոլորտի մեկ այլ կարևոր խնդիր նախարար Իգնատի Առաքելյանն ընդգծել է նաև սառնարանային տնտեսությունների ստեղծման անհրաժեշտությունը:

 

Իր հերթին դեսպան Յոհաննես Դաուման, անդրադառնալով Հայաստանում Նիդերլանդների աջակցությամբ իրականացվող գյուղատնտեսական ծրագրերի արդյունավետությանը, հատկապես հաջողված է համարել ՀՀ գյուղատնտեսության նախարարության համագործակցությունը PUM հոլանդական փորձագիտական խմբի հետ, որը տրամադրում է գործարար խորհրդատվություն և տեխնիկական աջակցություն տարբեր երկրների գերատեսչություններին և կազմակերպություններին:  

 

Կողմերը պայմանավորվել են առավել հանգամանորեն ուսումնասիրել հետագա համագործակցության հնարավոր ուղիները, ինչպես նաև միջոցներ ձեռնարկել համատեղ ծրագրերի արդյունքներն ավելի տեսանելի դարձնելու ուղղությամբ:

 

 

 ՀՀ գյուղատնտեսության նախարարության տեղեկատվության

 և հասարակայնության հետ կապերի բաժին

 

 

Տպել