Պետական օժանդակության ծրագրերով հանրապետություն է ներկրվել աշնանացան ցորենի սուպերէլիտային սերմացու

2015-08-31

1«Հայաստանի Հանրապետությունում ցորենի սերմնաբուծության և սերմարտադրության զարգացման ծրագրի» շրջանակներում Ռուսաստանի Դաշնությունից «Սերմերի գործակալություն» ՊՈԱԿ-ի կողմից հանրապետություն է ներկրկվել 40 տոննա աշնանացան ցորենի սուպերէլիտային սերմացուի խմբաքանակը։

 

ՀՀ գյուղատնտեսությանն նախարար Սերգո Կարապետյանն այսօր այցելել է Մասիսում գտնվող պահեստ, ծանոթացել սերմերի որակին և անձամբ հետևել բաշխման գործընթացին:

 

Ներկրված սերմացուն հատկացվելու է Շիրակի, Լոռու, Սյունիքի և Գեղարքունիքի մարզերի ցորենի սերմնաբուծությամբ զբաղվող այն ֆերմերներին, որոնք նախկինում ընդգրկված են եղել նշված ծրագրում, ունեն յոթ և ավելի հեկտար ջրովի վարելահողեր: Ներկրված սերմերի ցանքերի յուրաքանչյուր հեկտարից ակնկալվում է ստանալ  նվազագույնը 50 ցենտներ ցորենի բերք: Սերմացուի մի մասը կտրամադրվի «Գյումրիի սելեկցիոն կայան» ՓԲԸ-ին:

 

Սերմացուն տրամադրվել է շահառուներին 2015 թվականի աշնանացանի աշխատանքները ժամանակին կատարելու, ցանքատարածությունների ընդարձակման, բերքատվության բարձրացման և գյուղատնտեսությամբ զբաղվող տնտեսավարող սուբյեկտների եկամուտների ավելացման նպատակով:

 

«Ծրագրի շնորհիվ վերջին հինգ տարիներին սերմնաբուծության ոլորտում մեզ հաջողվել է հասնել բարձր արդյունքների. միայն այս տարի հացահատիկային մշակաբույսերի շուրջ 11 հազար հեկտար լրացուցիչ ավել ցանք է կատարվել: Ցորենի միջին բերքատվությունը մեկ հեկտարի հաշվով 2014 թվականին ավելացել է 83 տոկոսով, իսկ 2015 թվականին բերքի համախառն արտադրության ծավալները կգերազանցեն նախորդ տարվա մակարդակը», – նշել է իր խոսքում նախարար Սերգո Կարապետյանը:

 

Ադրադառնալով հացահատիկի բերքահավաքի աշխատանքներին՝ նախարարը նշել է, որ դրանք կավարտվեն առաջիկա 10 օրերի ընթացքում, ակնկալվում է, որ այս տարի կգերազանցվեն վերոգրյալ ցուցանիշները։

 

Նախարարը հավելել է, որ ընթացիկ տարում մարզպետարանների կողմից ներկայացված սերմացուների պահանջը կազմում է 3 875 տոննա:

 

ՀՀ գյուղատնտեսության նախարարության «Սերմերի գործակալություն» ՊՈԱԿ-ի տնօրեն Վլադիմիր Մանուկյանը զեկուցել է նախարարին, որ ծրագրով նախատեսված է հանրապետություն ներկրել 1509 տոննա առաջին վերարտադրության և 40 տոննա սուպերէլիտային սերմեր, որից օգոստոսի 31-ի դրությամբ արդեն ներմուծվել է 1300 տոննա առաջին վերարտադրության և 40 տոննա սուպերէլիտային սերմեր: Մնացած խմբաքանակը հանրապետություն կժամանի մինչև սեպտեմբերի 8-ը:

 

Ֆերմեր Վռամ Գյուլզադյանը, ով արդեն 4 տարի է, ինչ ծրագրի շահառուներից է, հաջողված է համարում այս ծրագիրը և նշում, որ  էլիտային սերմերի ցանքերից միջին հաշվով ստացել է 7 տոննա բերք։

 

Սերմացուն հատկացվում է գյուղացիական տնտեսություններին հաջորդ տարի բերքահավաքից հետո 1:2 փոխհարաբերությամբ աշնանացան ցորենի էլիտային սերմացուի վերադարձի պայմանով:

 

ՀՀ գյուղատնտեսության նախարարության տեղեկատվության և
հասարակայնության հետ կապերի բաժին

 

 

 

Տպել