ՀՀ գյուղատնտեսության նախարար Իգնատի Առաքելյանն այսօր ընդունել է Հայաստանում Վրաստանի արտակարգ և լիազոր դեսպան Գիորգի Սագանելիձեին` երկկողմ համագործակցության հեռանկարները քննարկելու նպատակով:

 

Ողջունելով հյուրին` նախարարը գոհունակություն է հայտնել հայ-վրացական հարաբերությունների բարձր մակարդակից և հույս հայտնել, որ այն կկրի շարունակական բնույթ:

 

«Հայաստանն ու Վրաստանը պատմական և աշխարհագրական առումով մշտապես սերտորեն կապված են եղել, գյուղատնտեսության ոլորտում ձևավորվել է ամուր համագործակցություն, կազմակերպվել են գյուղատնտեսության նախարարների փոխայցեր: Սակայն երկու երկրների միջև գյուղատնտեսության ոլորտում առկա են լայն հնարավորություններ և դեռևս չօգտագործված մեծ ներուժ, և հարկավոր է միջոցներ ձեռնարկել երկկողմ  համագործակցությունն ավելի ակտիվացնելու ուղղությամբ», – նշել է նախարարը:

 

Ընդգծելով, որ վրացական շուկան միշտ բաց է հայկական գյուղատնտեսական արտադրանքի համար` դեսպան Գիորգի Սագանելիձեն վստահեցրել է, որ իր գործունեության ընթացքում կանի հնարավորը այս ոլորտում երկկողմ հարաբերությունները խորացնելու, ինչպես նաև հայ-վրացական գործարար կապերն ընդլայնելու ու ամրապնդելու համար:

 

Հանդիպման ընթացքում դեսպանը Իգնատի Առաքելյանին հրավիրել է այցելել Վրաստան` տեղում հարևան երկրի գյուղատնտեսության բնագավառի ներկա վիճակին ծանոթանալու նպատակով: Ի պատասխան ՀՀ գյուղատնտեսության նախարարը խնդրել է դեսպանին իր վրաց գործընկերոջը փոխանցել Հայաստան այցելելու հրավերը:

 

 
ՀՀ գյուղատնտեսության նախարարության տեղեկատվության
և հասարակայնության հետ կապերի բաժին

Տպել