ՀՀ գյուղատնտեսության նախարար Իգնատի Առաքելյանն այսօր ընդունել է Համաշխարհային բանկի երևանյան գրասենյակի ղեկավար Լորա Բեյլիին` հետագա համատեղ ծրագրերը  քննարկելու նպատակով:

 

Կարևորելով Համաշխարհային բանկի կողմից Հայաստանում կատարվող ծրագրերը` նախարարը, մասնավորապես, բարձր է գնատահել գյուղատնտեսության ոլորտում իրականացվող «Համայնքների գյուղատնտեսական ռեսուրսների կառավարման և մրցունակության» առաջին և երկրորդ ծրագրերի (CARMAC) արդյունավետությունն ու բարեհաջող ընթացքը:

 

««Համայնքների գյուղատնտեսական ռեսուրսների կառավարման և մրցունակության» ծրագիրը կարևոր նշանակություն ունի մեր երկրում անասնապահության զարգացման համար, և այս հաջողություններն ամրապնդելու համար և հաշվի առնելով համայնքներում ծրագրի պահանջարկը` կարծում եմ, հարկավոր է ապահովել դրա շարունակականությունը», – նշել է Իգնատի Առաքելյանը:

 

Անդրադառնալով մեր երկրում գյուղատնտեսության ներկա իրավիճակին և ոլորտում առկա խնդիրներին` նախարարը նշել է, որ ոլորտի կայուն զարգացման ապահովման համար այսօր անհրաժեշտ է աջակցություն ցուցաբերել հատկապես այն ֆերմերներին, որոնք բիզնես-մոտեցում կցուցաբերեն խնդիրների լուծման ուղղությամբ, ինչը թույլ կտա հաջողությամբ իրականացնել կառավարության կողմից մշակվող ռազմավարական ծրագրերն ու ապահովել աշխատանքի բարձր արդյունավետություն:

 

Համաշխարհային բանկի երևանյան գրասենյակի ղեկավար Լորա Բեյլին համակարծիք էր ՀՀ գյուղատնտեսության նախարարի հետ առ այն, որ Հայաստանում ագրարային բնագավառի հետագա զարգացման համար անհրաժեշտ է վերանայել համագործակցության առանցքային ուղղությունները` ծրագրերում ավելի ակտիվորեն ներգրավելով ձեռնարկատիրական մտածելակերպով ֆերմերներին:

 

Շեշտելով, որ գյուղատնտեսության ոլորտը միշտ եղել է Համաշխարհային բանկի առաջնահերթությունների շարքում` երևանյան գրասենյակի ղեկավարը վերահաստատել է բանկի պատրաստակամությունը շարունակել փոխգործակցությունը ՀՀ գյուղատնտեսության նախարարության հետ` ակնկալելով աջակցությունը մշտադիտարկման և գնահատման գործողությունների իրականացման հարցում:

 

Հանդիպմանն անդրադարձ է կատարվել Հայաստանում գյուղատնտեսական քաղաքականության մշտադիտարկման և գնահատման, ինչպես նաև կլիմայի փոփոխության ազդեցության նվազեցման վերաբերյալ դրամաշնորհային ծրագրերի իրականացման հնարավորությանը:  

 

Զրույցի ընթացքում քննարկվել են անասնաբուծությանը, անասնաբուժությանը, արոտների ջրարբիացմանը, նորագույն տեխոլոգիաների ներմուծմանն ու ներդրմանը և  գյուղատնտեսության ոլորտին առնչվող այլ հարցեր ևս:

 

ՀՀ գյուղատնտեսության նախարարության տեղեկատվության և
 հասարակայնության հետ կապերի բաժին

Տպել