ՀՀ գյուղատնտեսության նախարար Իգնատի Առաքելյանն այսօր ընդունել է METRO AG ընկերության արտաքին կորպորատիվ քաղաքականության գծով փոխնախագահ, ընկերության մոսկովյան ներկայացուցչության ղեկավար Ալեքսեյ Գրիգորևին: Հանդիպմանը մասնակցում էր նաև Ռուսաստանում ՀՀ առևտրական ներկայացուցիչ Կարեն Ասոյանը:

 

Համառոտ ներկայացնելով METRO AG ընկերության գործունեության հիմնական ուղղությունները` հյուրը  նշել է, որ այն հիմնականում զբաղվում է մանրամեծածախ առևտրով և հետաքրքրված է երկարաժամկետ համագործակցություն ծավալել գյուղատնտեսական արտադրանք թողարկող և արտահանող հայաստանյան ընկերությունների հետ: Նա վստահություն է հայտնել, որ հայկական գյուղմթերքն իր որակական ու համային հատկանիշներով կարող է հետաքրքություն առաջացնել իրենց հաճախորդների և սպառողների շրջանում:

 

Այս առումով Ալեքսեյ Գրիգորևը նպատակահարմար է համարել համագործակցել մասնավորապես հայկական պտուղ-բանջարեղենի, ալկոհոլային խմիչքների, ձկնամթերքի և սառեցված հատապտղի մատակարարման հարցերում` որպես արդյունավետ գործընկերային հարաբերությունների գրավական ընդգծելով ոչ միայն մատակարարվող արտադրանքի բարձր որակի ապահովումը, այլև փաթեթավորման, լոգիստիկայի և մարքեթինգի իրականացման կարևորությունը:

 

Պատրաստակամություն հայտնելով աջակցել METRO AG ընկերությանը Հայաստանում գործընկերներ գտնելու հարցում` նախարար Իգնատի Առաքելյանը նշել է, որ հայկական կողմը շահագրգռված է գտնել այն եզրերը, որոնցում համագործակցությունը կլինի  առավելագույնս փոխշահավետ և արդյունավետ:

 

«Հայաստանն ունի գյուղատնտեսական մթերքի արտադրության մեծ ներուժ, և մենք հույս ունենք, որ METRO AG ընկերությանը կհաջողվի մեր երկրում գտնել  վստահելի գործընկերներ», – նշել է նախարարը:

 

ՀՀ գյուղատնտեսության նախարարը խոստացել է ուսումնասիրել ընկերության կողմից ներկայացված առաջարկները և օժանդակել հայաստանյան արտադրողների և արտահանողների հետ գործարար կապերի հաստատման հարցում:

 

 

 

ՀՀ գյուղատնտեսության նախարարության տեղեկատվության և

 հասարակայնության հետ կապերի բաժին

Տպել