ՀՀ գյուղատնտեսության նախարար Սերգո Կարապետյանն այսօր Արագածոտնի մարզպետ Սարգիս Սահակյանի հրավերով մասնակցել է  մարզի խորհրդի նիստին:

 

Գյուղատնտեսության և բնապահպանության վարչության պետ Յուրա Ազատյանը զեկուցել է աշնանացանի գործընթացի կազմակերպման մասին: Նրա տեղեկացմամբ, ընթացիկ տարում հացահատիկային և հատիկաընդեղեն մշակաբույսերի ցանքային տարածությունները կազմել են 26,261 հեկտար, 2013 թվականի 24,424 հեկտարի դիմաց, ընդ որում ցորենի ցանքատարածություններն  ավելացել են 480 հեկտարով, իսկ գարու ցանքատարածությունները՝ 1272 հեկտարով։ Նա նշել է նաև, որ  մարզում արդեն կատարվել է 9200 հեկտար աշնանացան, սակայն մինչև տարեվերջ այն կհասնի 12 000 հեկտարի:

 

«Քանի որ գյուղատնտեսական տարին մոտենում է ավարտին, և բերքահավաքի  մոտ 90 տոկոսն արդեն իրականացվել է, մենք կազմակերպում ենք հանդիպումներ մարզերում, որպեսզի քննարկենք կատարված աշխատանքներն ու լուծում տանք առկա խնդիրներին», – նշել է նախարարը:

 

Նախարար Սերգո Կարապետյանը մարզխորհրդի նիստի մասնակիցներին ներկայացրել է 2015 թվականին գյուղատնտեսության ոլորտում իրականացվող ծրագրերը և տեղեկացրել, որ պետական աջակցության ծրագրերի շրջանակներում գյուղացիներին մատչելի պայմաններով տրամադրվում են սերմացուներ, պարարտանյութեր, դիզելային վառելանյութ, ինչպես նաև գյուղատնտեսական վարկեր: Նախարարը հավաստիացրել է, որ այս ծրագրերը հաջորդ տարի նույնպես կշարունակվեն և հորդորել է ավելացնել մարզում իրականացվող աշնանացանի ծավալները:

 

Նախարարը կարևորել է Համայնքների գյուղատնտեսական ռեսուրսների կառավարման և մրցունակության (CARMAC) ծրագիրը և նշել է, որ մանր գյուղացիական տնտեսությունների հզորացման միակ ճանապարհը միավորումների և կոոպերատիվների ստեղծումն է:

 

ՀՀ գյուղատնտեսության նախարար Սերգո Կարապետյանը ներկաներին տեղեկացրել է, որ հոկտեմբերի 11-ից մեկարկելու է Գյուղատնտեսական համատարած հաշվառման ծրագիրը: Նախարարը կարևորել է այս ծրագիրը և նշել է, որ այն հնարավորություն կտա պարզել գյուղատնտեսության ոլորտի իրական պատկերը:

 

Գյուղատնտեսական համատարած հաշվառման նպատակն է տեղեկություններ հավաքագրել գյուղատնտեսական նշանակության հողերի, կենդանիների գլխաքանակի, գյուղտեխնիկայի, գյուղատնտեսական նշանակության շենք-շինությունների, մարդկային, նյութական ներուժի և դրանց օգտագործման վերաբերյալ:

 

Հանդիպման ավարտին ՀՀ գյուղատնտեսության նախարար Սերգո Կարապետյանը  նշել է, որ հոկտեմբերի 19-ին Հայաստանի Հանրապետությունում նշվելու է Գյուղատնտեսության  աշխատողի օրը, որի առթիվ շնորհավորել է մարզի բնակիչներին և մաղթել բարեբեր տարի:

 

 

ՀՀ գյուղատնտեսության նախարարության տեղեկատվության և

հասարակայնության հետ կապերի բաժին 

 

Տպել