Նախապատրաստվում է Համայնքների գյուղատնտեսական ռեսուրսների կառավարման և մրցունակության երկրորդ ծրագիրը
2014-05-21
Մայիսի 20-ին ՀՀ գյուղատնտեսության նախարարի մոտ կայացած խորհրդակցությանը քննարկվել են Համայնքների գյուղատնտեսական ռեսուրսների կառավարման և մրցունակության երկրորդ ծրագրի «Արժեքային շղթայի զարգացում» բաղադրիչի նախապատրաստական աշխատանքների շրջանակում միջազգային և տեղական խորհրդատուների կողմից իրականացված ուսումնասիրությունների արդյունքները։
ՀՀ գյուղատնտեսության նախարարության պատասխանատուներից բացի քննարկմանը մասնակցել են նաև «Գյուղատնտեսական ծրագրերի իրականացման գրասենյակի» մասնագետներն ու նշված ծրագիրը նախապատրաստող խորհրդատուներ։
« Այս ծրագիրը մեզ համար շատ կարևոր է, քանի որ դրանով մենք ամբողջացնում ենք ողջ արտադրական շղթան։ Իրականացված նման առաջին ծրագիրն արդյունավետ ընթացք է ունեցել, ուստի և Համաշխարհային բանկի առաջարկությամբ մենք պատրաստվում ենք իրականացնել երկրորդ ծրագիրը» – նշել է նախարար Սերգո Կարապետյանը։
Ծրագրի մշակման հեղինակների կողմից մասնակիցների քննարկմանն են ներկայացվել կաթի, տավարի և ոչխարի մսի, մրգի, բանջարեղենի և մեղրի արտադրության ոլորտներում սննդի բիզնեսով զբաղվող կազմակերպությունների գործունեության ուսումնասիրությունները, ինչպես նաև նշված արժեշղթաներում հասցեագրվելիք համաֆինանսավորման առաջարկությունները։ Քննարկվել են ծրագրի իրականացման համար առաջարկվող թիրախային ոլորտներն ու բաղադրիչների տեսակները։
Շահագրգիռ քննարկման արդյունքում հանձնարարվել է ծրագիրը նախապատրաստող խմբին և խորհրդատուներին՝ մինչև հունիսի 15-ը, միջազգային փորձի ուսումնասիրությամբ և տեղական պայմանների հաշվառումով, լրամշակել նախագիծը, ներկայացնելով ծրագրի իրականացման համար պահանջվող կոնկրետ առաջարկություններ։
«Մեր նպատակը փոքր արտադրություններն արդյունաբերական դարձնելն է։ Ներկայացված ուսումնասիրություններում բացակայում են արժեշղթաների զարգացման համար պահանջվող առաջնահերթ թիրախները։ Իսկ վերջիններիս ընտրության հարցում մենք սխալվելու իրավունք չունենք»- ամփոփելով քննարկումը՝ նշել է նախարար Սերգո Կարապետյանը։
